M pa responsab - Powèm yon fanm damou, tèks 2

Si kè w reponn lè je m rele
Si zepòl ou la pou m ka piye
Si mouchwa w konprann lè m vle kriye...

M pa responsab!

Si dan w refize ri malè m
Si pye w fè sèman pou l kouri dèyè m
Si souri w kase bwat sekrè m...

M pa responsab!

Si w deside konnen m
Si w dakò kenbe men m
Si w ap plede renmen m...

Anverite m pa responsab!

M pap responsab sa m santi si se ou ki chèche l
M pap responsab si m bezwen w
Si kè m chape w ap oblije ranmase l
Paske... M pap responsab si m renmen w!

Shell Pomme