Dekouvri oubyen re-dekouvri “Lanmou/ Limyè” Apollon Pascal la

Apollon Pascal se yon powèt, dizè epi « slamè ». Se sitou « slam » ki fè anpil moun konnen l, se atravè sipò sa li travay pwezi l. Se avèk anpil plezi nou koute l ki ap fè nou vizite « Bidonville dans la tête » li a, jodya li vini ak yon lòt son, yon demo li bay kòm tit : « Lanmou/ Limyè ». Demo sa ki fèt nan kolaborasyon ak Mr. W., genyen sèlman tèks kreyòl sou li.

Lamou limyè zantray !

Se konsa son ki pote menm non ak demo a kòmanse. Petèt atis la kapab jwenn enspirasyon nan « Peace and Love » (Lapè ak lanmou) men de mo sa yo nan bouch li tounen yonn, se lanmou ki pa separe ak limyè paske pa bò isit se nan tenèb nou tout ap mache, se rayisman ki pete je nou.

Pa bò isit, bonè sanble gen mèt li.

Ou ta di se pi bèl fòmil otè a te kapab jwenn pou di jan isit se kèk grenn moun ki byen. Manno Charlemagne pat ka fè miyò. Fòmil sa gen yon kokennchenn verite vyolan ladan. Eske otè pawòl sa rann li kont sa kapab lanse yon revolisyon ?

Limyè fè nou konnen kiyès ki pa trèt !

Se yon lòt fraz ki demontre nivo refleksyon ki genyen nan demo sa ki pa sèlman atistik, men filozofik tou. Yon moun ki chwazi koute Lanmou/ Limyè pa ka pa tande apèl pou yon chanjman politik nan demo sa tou tankou lè nou tande « Ofisyèl lage zam nan geto a, se pou n tire sou do pye n » oubyen « Geto a chaje zam san bibliyotèk ». Kidonk, pou Apollon ak Mr. W ki kolabore sou premye son sa nan demo a, edikason ak politik pwòp se kle pou nou vire do bay mizè ak inyorans.

Men demo a pa kanpe la, li gen 4 lòt son : Gouyad Tanbou w (ak Maestro Jhilens), Koulè Lanmou (ak Ruth J. Baptiste), Tipa Tipa, Jenerasyon Jak Estefèn.

Koulè lanmou se yon deklarasyon lanmou Mr. W. ap lage san pran souf pandan Ruth ap chante refren an ak yon vwa ki kaptive zorèy. Se prèv yon nèg kapab file an kreyòl san konplèks, ak yon pwezi ki pa gen parèy li nan lang Voltaire a.

Yon lòt bò, ak Maestro Jhilens, Apollon pran fè yon konparezon ak lanati pou dekri kò yon fanm, bote l ak souri l. Tout sa fèt nan 4 minit nan Gouyad Tanbou w, yon son ki marye bèl bagay ak bagay nou pat panse ki gen bèlte. Apollon fè sa l vle ak mo yo, epi Jhilens jwe ak mizik lan sou refren an, sa ki bay yon bèl kolaborasyon sou demo sa.

Tipa tipa se yon espas kote Mr. W. ouvè kò l pou repete pou moun ki vle tande : « Lòm fèt lib men lòm dwe aprann libète. » Se yon ti pale sou esklavaj, sou istwa nasyon an, sou fòs inyon, sou Tousen, Desalin ak lòt gwo potorik gason ki te akouche peyi lib sa ki pote non Ayiti. Se yon apèl pou nou rejwenn fyète nou, ki se chemen pou nou aprann libète.

Demo a fini ak Jenerasyon Jak Estefèn, yon son kote nou preske pa ka souliye okenn pawòl pou evite ekri tout pawòl yo nan grenn atik sa. Jenerasyon Jak Estefèn pran pretèks sou Lajan PetwoKaribe a pou mande jistis sosyal, pou mande byennèt pou tout moun. Jan Apollon di l la : « Se dlo pou tout moun mwen vle, se pa chanpay pou kèk grenn. ». Petèt sa ka ede nou pran konsysans epi pran pozisyon lè nou aprann : « Ni militan, ni lach, n ap degrennen grenn an grenn […] Tonbe san batay oubyen egziste kon Jak Estefèn, pou n chwazi ».Eske nou pare pou nou chwazi lanmò olye n zonbi ?

Nenpòt pozisyon ou ta genyen, nenpòt bò ou ta kanpe, se menm konsèy la Apollon gen pou tout moun. Li di nou : « Ann boske, se sa ki devwa nou. ».

Si ou ta renmen koute demo sa, al sou SoundCloud nan lyen sa yo :

Lanmou/Limye

Jenerasyon Jak Estefen

Al koute Apollon sou SoundCloud:

Apollon Pascal sou SoundCloud

Jean-Elie François

francoisjeanelie27@gmail.com