Taksi vid pa kouri vit

Objektif: se konsa nou rele yon bagay nou vle fè nan yon kantite tan nou prevwa pou sa. Kèlkeswa objektif ou, genyen fason pou w rive atenn yo, nou rele sa yo mwayen. Lè w marye objektif ak mwayen, ou sou wout pou reyalize rèv ou. Yonn nan kesyon ki enpòtan pou n poze se : ki mwayen pou ki objektif ?

Souvan, nou konpare lavi ak yon chemen kote nou dwe soti nan yon pwen A pou rive nan yon pwen B. Nan menm lojik sa, gen refleksyon ki fèt sou vitès ou mache oubyen kouri sou pakou a. Genyen plizyè sitasyon ki pale sou sa : "Sa ki mache dousman ap rive kanmenm."1; "Kouri pa sèvi anyen, fòk ou deplase lè w dwe deplase a."2; "Yon moun poukont li ap ale pi vit, men ansanm n ap ale pi lwen."3. Si nou tonbe dakò ak pawòl sa yo, nou kapab rive konprann vitès la pa tèlman enpòtan pase sa, se rive a ki tout bagay la. Oubyen ankò nou kapab di rive lwen pi enpòtan pase rive vit. Se vre, ale dousman riske fè w anreta men gen moman pou w deplase soti nan pwen A a, w ap gen kont tan pou w rive nan pwen B a san w pa kouri pou sa. Kidonk, regle mont ou, touse pye pantalon w, mare senti w epi kòmanse wout la. Mache byen trankil, kisa sa pral sèvis pou w kouri ak tout vitès ou epi w pa rive nan dènye liy viktwa a akoz twòp fatig ?
Gen yon lòt fason kèk moun eksplike pakou lavi a. Yo divize tout moun fè kat (4) pati sou yon wout :
1- Premye gwoup la se moun k ap avanse byen vit.
2- Dezyèm lan se moun ki ralanti san yo pa sispann avanse.
3- Twazyèm nan se sila yo ki kanpe sou bò wout la.
4- Katriyèm lan se moun k ap fè bak.
Nan abitid (move abitid) lòm genyen pou kouri jije, nou riske di se premye kategori a sèlman k ap rive, oubyen k ap rive alè. Men kisa ki di moun ki ralanti yo p ap evite yon danje yo gentan wè? Kisa ki di moun ki pi rapid yo p ap pran pàn nan wout la, kisa ki di yo p ap ralanti oubyen abandone yon jou? Nou dwe gen sajès sa pou nou rekonèt nou pa konn kijan demen fèt. Yon lòt kote, ralanti pa sinonim anreta ni sa pa vle di ou p ap rive. Ou ka ralanti pou evite yon danje, paske w manke byen wè wout la, pou w respekte konsiy pano yo bay sou wout la oubyen pou yon lòt rezon valab. Ralanti si w bezwen, pa bay tèt ou pwoblèm pou sa. M pa ankouraje w rive anreta men sa ki pi enpòtan an se rive. Toujou nan pote jijman rapid, anpil moun ap kondane moun ki kanpe bò wout la. Nou pa menm bezwen site rezon ki ka fè w kanpe, yo anpil. Rezon ou kanpe a kapab pa soti nan volonte w. Sèl bagay, m vle w fè efò pou w pa rete kanpe twò lontan. Pa kite malè rive w pou w pran rasin, sonje ou fèt pou w deplase. Tankou Jezi te di kokobe a, m anvi di w : "Leve mache". E ou menm ki wè yon moun kanpe, olye w jije al chèche mwayen ede l. Pafwa, li sèlman bezwen w koute l. Konsa tou, li kapab bezwen w kenbe men l pou kèk tan. Toujou chèche konprann epi ede olye jije. Nenpòt sa ki rive, pa fè bak sof si se pou w fè yon pi bon wout. Pa fè bak pou w evite yon eprèv, sa rele lach. Pa fè bak devan gwo miray, konstwi yon echèl pito. Pa fè bak devan lanmè, fè yon bato epi travèse l. Pa fè bak devan okenn obstak ki vin bare wout ou. Si w pa ka pase anwo, pase anba, osinon pase akote. Si w pa reyisi fè sa, kraze l pou w pase. Ou lib pou w kreye chemen w, pa fèmen tèt ou nan chemen tou trase pandan anpil nan yo mennen nan enpas oubyen nan twou.
Pa janm neglije avanse.
Men toujou sonje ou pa oblije kouri byen vit nan tout okazyon jis pou w imite lòt moun oubyen pou afiche pèfòmans ou. Sa p ap sèvi w anyen. Ann kontinye itilize konparezon. Taksi vid pa konn kouri vit, se yon bagay tout moun ki abitye pran taksi oubyen ki konn suiv konpòtman chofè taksi yo ka remake. Paske yo toujou ap chèche kliyan, yo pa janm prese lè konsa. Fòk ou ta wè jan yo woule dousman lè y ap gade agoch adwat kote yon kliyan ap soti. Men menm la, se pa yon konpòtman fiks, yon taksi vid kapab kouri byen vit kèk fwa paske li gen yon kote li pral chèche yon kliyan. Lè sa, se kòmsi li pa vid nan reyalite a e se ou menm ki pa ka wè kliyan li deja genyen an.
Si w se taksi vid, pouki w ap kouri vit ? Eske mwayen w marye byen ak objektif ou ? Eske aksyon w ap poze a twouve sous li nan sa w vle jwenn kòm rezilta oubyen eske w jis ap imite epi pèfòme ? Nan ka ou aji pou w jwenn bon jan rezilta w ap chèche a, kontinye. Men si w ap repete, si w ap konfòme w, si w ap fè espektak ak lavi w pou fè moun plezi, kanpe sèk.
Pran poz; reflechi sou objektif ou; chèche mwayen ki mache avè l; epi avanse. Yon konsèy pou fini: avanse ak lòt moun, w ap pwofite eksperyans yo epi w ap jwenn okazyon ede moun. M swete w rive nan lè pou w rive a, m swete w jwenn lajwa nan fè pakou a.
Nòt :
1- Qui va lententement va / arrive surement. (Chi va piano va sano) Proverbe corse
2- Rien ne sert de courir, il faut partir à point. Jean de La Fonfaine dans la fable : Le Lièvre et la Tortue
3- Seul, on va plus vite. Ensemble, on va plus loin. Proverbe africain.

Jean-Elie François
francoisjeanelie27@gmail.com